yun zabt-e-musalsal ka sila kyun nahin dete
har naqsh-e-tamanna hi mita kyun nahin dete

manzil pe bhi aasuda-e-manzil na hua dil
phir hum ko bhatakne ki dua kyun nahin dete

rah rah ke sulagte hain khayalon mein nae gham
yaadon ke saman-zar jala kyun nahin dete

us se to hikayat-e-junun aur badhengi
chup kyun ho koi baat bana kyun nahin dete

dil hai to kahin nazr karo kaam to aae
sar hai to kisi dar pe jhuka kyun nahin dete

aain-e-karam bhul gae ahl-e-nazar bhi
mahaul ko aaina dikha kyun nahin dete

milta hai pata jin ko tere nam se apna
wo log hamein tera pata kyun nahin dete

kaise main pukaron ki bahut dur hun tum se
tum dil ke qarin ho to sada kyun nahin dete