zabt-e-gham ka payam are tauba
aur mere dil ke nam are tauba

zahid aur mai ka jam are tauba
un se ye nek kaam are tauba

hashr-saman hai hashr-manzar hai
teri mashq-e-khiram are tauba

aashiqon ki namaz ai zahid
su-e-bait-ul-haram are tauba

main wafa ki umid rakhta hun
tujh se o fitna-kaam are tauba

pad gae hae jaan ke lale
ishq ka intiqam are tauba

'arzu' chhod kar dar-e-jaanan
tauf-e-bait-ul-haram are tauba