zahar deta hai koi koi dawa deta hai
jo bhi milta hai mera dard badha deta hai

kisi hamdam ka sar-e-sham khayal aa jaana
nind jalti hui aankhon ki uda deta hai

pyas itni hai meri ruh ki gahrai mein
ashk girta hai to daman ko jala deta hai

kis ne mazi ke darichon se pukara hai mujhe
kaun bhuli hui rahon se sada deta hai

waqt hi dard ke kanton pe sulae dil ko
waqt hi dard ka ehsas mita deta hai

'naqsh' rone se tasalli kabhi ho jati thi
ab tabassum mere honton ko jala deta hai