zahir na tha nahin sahi lekin zuhur tha
kuchh kyun na tha jahan mein kuchh to zarur tha

mai ko mere surur se hasil surur tha
main tha nashe mein chur nasha mujh mein chur tha

kam-maya fard-e-jurm hai kya kahiye ai karim
hum se kami hui ye hamara qusur tha

le ja rahe hain dost mujhe aa raha hai dost
kya maut ko bhi aaj hi marna zarur tha

mulk-e-sukhan har ahl-e-sukhan ko hua nasib
'natiq' mere nasib mein ye nagpur tha