zakhm-e-dil ho gae nasur tumhein kya malum
tum to ho mujh se bahut dur tumhein kya malum

mere honton ke tabassum pe na jaana hargiz
haal-e-barbaadi-e-majbur tumhein kya malum

kab sitaron ka jahan ho gaya tarik nazar
chandni kab hui be-nur tumhein kya malum

roz-o-shab kis pe baraste hain sitam ke patthar
dard se kaun hua chor tumhein kya malum

kitne aalam-o-masaib se guzarta hun main
ishq ke kya kya hain dastur tumhein kya malum

kya bataoge 'asad' tut ke kya bikhra hai
tum to ho aaj bhi makhmur tumhein kya malum