zamin hai wahm to ye aasman dhuan dhuan hai
makan khayal hai aur la-makan dhuan dhuan hai

hai khushbuon ko tere jism-o-jaan se nisbat
agar nahin hai to har jism-o-jaan dhuan dhuan hai

wahan jo hijr mein poshak-e-aina hai khak
to ek shakl-e-barahna yahan dhuan dhuan hai

agar sada-e-shab-e-be-karan nahin pur-shor
to aalam-e-saf-e-sayyargan dhuan dhuan hai

ajib ahd hai sab mashalen hain ru-ba-zawal
fasurda lau mein chamakta guman dhuan dhuan hai

palat bhi aa ki tere intizar mein koi dukh
koi wajud koi shama-dan dhuan dhuan hai

ajib hain ye dil-o-dida-o-nigah-o-nafas
ye aag pani hawa sab dhuan dhuan dhuan hai

agar hai kar-e-hunar mein bhi jabr-e-arz-e-hunar
to lazmi hai ki haft aasman dhuan dhuan hai