zamin ko sar pe uthae hue na chal ghafil
agar hai hosh to hushiyar ho sanbhal ghafil

yahan na dil ko masarrat na ruh ko rahat
ye ghar kharab hai is se abhi nikal ghafil

qaza kisi ko na chhodegi shah ho ki gada
na tu rahega na daulat na ye mahal ghafil

zarur dil pe asar ho teri nasihat ka
kahe zaban se jo khud us pe kar amal ghafil

fuzul umr na kho khel kud mein 'raushan'
ye wo mataa hai jis ka nahin badal ghafil