zamin pe jab bhi kisi parsa ko dukh hoga
khuda gawah hai khalq-e-khuda ko dukh hoga

wafa ke nam pe ai shakhs bewafai na kar
hamari khair hai lekin wafa ko dukh hoga

jala raha tha charaghon ko band kamron mein
wo jaanta tha ki aise hawa ko dukh hoga

jahan wo baithega kahlaegi wo ja-e-nafis
aur aas-pas ki sari jagah ko dukh hoga

main mushkilat mein hun par khuda ko ilm na ho
mujhe pata hai ki mere khuda ko dukh hoga

kuchh achchhe log faqat is liye bhi laut gae
unhen laga tha ki shayad qaza ko dukh hoga