zamin pe rah ke kahan fikr-e-asman rakhna
tum apne dost jo rakhna to ham-zaban rakhna

mohabbaton ko nae hausle ata karna
adawaton ko tah-e-tegh ham-rahan rakhna

bikhar na jae meri zindagi ka shiraaza
mere khuda meri himmat ko tu jawan rakhna

ye mashghala bhi ajab hai hamare bete ka
har ek chiz uthana yahan wahan rakhna

banana ret ke ghar tum ko yaad to hoga
phir in gharon mein mohabbat ki sipiyan rakhna