zanjir kat ke kya giri aadhe safar ke bich
main sar pakad ke baith gaya rahguzar ke bich

utra lahad mein khwahishon ke sath aadmi
jaise musafiron-bhari naw bhanwar ke bich

dushman se kya bachaengi ye jhadiyan mujhe
bachte nahin yahan to payambar shajar ke bich

jitna uda main utna ulajhta chala gaya
ek tar-e-kam-numa tha mere baal-o-par ke bich

dete ho dastaken yahan sar phodte ho wan
kuchh farq to rawa rakho diwar-o-dar ke bich

ghar se chala to ghar ki udasi sisak uthi
main ne use bhi rakh liya rakht-e-safar ke bich

thakne ke hum nahin the magar ab ke yun hua
deta raha fareb sitara safar ke bich

mera sabhi ke sath rawayya hai ek sa
'shahid' mujhe tamiz nahin khair o shar ke bich