zat mein maujud maujon ki rawani se utha
zindagi ka lutf tarz-e-zindagani se utha

ya mere logon ko de ya-rab samaat ka shuur
ya meri aawaz gosh-e-la-maani se utha

aaine ko aks ki zanjir se aazad kar
chehragi ko khal-o-khad ki tarjumani se utha

ek nai hi shakl paida kar shikast-o-rekht se
ek naya mafhum apni raigani se utha

ek bazu se utha tu mashal-e-manzil 'samir'
aur safar ka bojh apne dast-e-sani se utha