zehn aur dil mein ajab jang hui hai is bar
zindagi mom se phir sang hui hai is bar

teri duniya jise hairat se sabhi dekhte hain
dekh kar mujh ko bahut dang hui hai is bar

mujh ko badlao nazar aaya hai khud mein bhi bahut
har ada us ki bhi be-dhang hui hai is bar

main jise ishq ki mearaj samajh baitha tha
wo tapasya bhi meri bhang hui hai is bar

fikr ke sahn mein masum ghazal ki titli
mera khun chus ke khush-rang hui hai is bar

main ghazal ko koi aahang nahin de paya
to ghazal khud mera aahang hui hai is bar

aasman-e-sukhan-o-sher se jo utri thi
wo zamin mujh pe bahut tang hui hai is bar