zehn ke bagh mein khada hun main
zakhm ke phul bantta hun main

gumbad-e-waqt par chadha hun main
khud ko aawaz de raha hun main

nai tahzib ki ziya hun main
apne sae se dar gaya hun main

zist ke khet se akela hi
dard ki fasl katta hun main

yaad rakkhega koi kyon mujh ko
ek jangal ka rasta hun main

mal ke wahshat ki rakh chehre par
shahr mein apne ghumta hun main

mujh ko apna lo main tumhaara hun
rah-e-ulfat ka hadisa hun main