zer-e-lab un ka muskura dena
dil mein shahnaiyan baja dena

jaane wale ye baat yaad rahe
hum ko aasan nahin bhula dena

kahin be-asra na kar de hamein
is qadar tera aasra dena

hum ko rone ki to ijazat do
agar aata nahin hansa dena

ho ke nakaam na-umid na hon
tu mujhe itna hausla dena

lakh 'hatim' ho koi lakh karan
kaun de sakta hai tera dena

sau bahaaron ki hai bahaar 'jigar'
un ka rah rah ke muskura dena