zikr-e-gul ho khar ki baaten karen
lazzat-o-azar ki baaten karen

hai masham-e-shauq mahrum-e-shamim
zulf-e-ambar-bar ki baaten karen

dur tak khali hai sahara-e-nazar
aahu-e-tatar ki baaten karen

aaj kuchh na-saz hai tab-e-khirad
nargis-e-bimar ki baaten karen

yusuf-e-kanan ka ho kuchh tazkira
misr ke bazar ki baaten karen

aao ai khufta-nasibo muflisho
daulat-e-bedar ki baaten karen

'jaun' aao karwan-dar-karwan
manzil-e-dushwar ki baaten karen