zinda rahne ke tazkire hain bahut
marne walon mein ji uthe hain bahut

un ki aankhon mein khun utar aaya
qaidiyon par sitam hue hain bahut

us ke waris nazar nahin aae
shayad us lash ke pate hain bahut

jagte hain to panw mein zanjir
warna hum nind mein chale hain bahut

jin ke sae mein raat guzri hai
un sitaron ne dukh diye hain bahut

tujh se milne ka rasta bas ek
aur bichhadne ke raste hain bahut