zindagani ko adam-abaad le jaane laga
har guzarta din kisi ki yaad le jaane laga

ek mahfil se uthaya hai dil-e-nashad ne
ek mahfil mein dil-e-nashad le jaane laga

kis taraf se aa raha hai karwan asbab ka
kis taraf ye khanuman-barbaad le jaane laga

ek sitara mil gaya tha raat ki tamsil mein
aasmanon tak meri fariyaad le jaane laga

main hi apni qaid mein tha aur main hi ek din
kar ke apne aap ko aazad le jaane laga