zindagi dahr mein sad-rashk-e-iram hone tak kitni be-kaif rahi subh-e-alam hone tak ahl-e-dil rah-e-mohabbat mein na jaane kitne mit gae hain teri ek chashm-e-karam hone tak khun-e-dil hoga rawan chashm-e-tamanna se meri jada-e-shauq mein andaza-e-gham hone tak muddaton bahr-e-khayalat mein duba hi raha lauh-e-dil par tera ek nam raqam hone tak kisi surat bhi sukun dil ko mayassar na hua tere dar par sar-e-taslim ke kham hone tak har-nafas aalam-e-tashkik mein guzra 'ahmad' khatm ye marhala-e-dair-o-haram hone tak