zindagi dard bhi dawa bhi thi
ham-safar bhi gurez-pa bhi thi

kuchh to the dost bhi wafa-dushman
kuchh meri aankh mein haya bhi thi

din ka apna bhi shor tha lekin
shab ki aawaz be-sada bhi thi

ishq ne hum ko ghaib-dan kiya
yahi tohfa yahi saza bhi thi

gard-baad-e-wafa se pahle tak
sar pe khema bhi tha rida bhi thi

man ki aankhen charagh thin jis mein
mere ham-rah wo dua bhi thi

kuchh to thi rahguzar mein sham-etalab
aur kuchh tez wo hawa bhi thi

bewafa to wo khair tha 'amjad'
lekin us mein kahin wafa bhi thi