zindagi daw pe har aan lagi rahti hai

zindagi daw pe har aan lagi rahti hai
dil ki bazi mein sada jaan lagi rahti hai

hain tere marka-ara ki tamashai hain
bhid kaisi sar-e-maidan lagi rahti hai

koi bilqis nazar aae na aae phir bhi
khoj mein ruh-e-sulaiman lagi rahti hai

khalq ummal se nalan hai magar yaron ko
fikr-e-khush-nudi-e-sultan lagi rahti hai

bakht-sazan-e-reaya mein kashish hai kitni
har nazar jaanib-e-aiwan lagi rahti hai

kyon badalta nahin tu is ko tawanai mein
aag to ai dil-e-hairan lagi rahti hai

aadmi shauq se farigh nahin rahta 'gulzar'
dhun koi zist ke dauran lagi rahti hai


Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close