zindagi ho gai kis tarah basar yaad nahin
roz-o-shab yaad nahin sham-o-sahar yaad nahin

lut gaya kaise mohabbat mein ye ghar yaad nahin
kaise barbaad hue qalb-o-jigar yaad nahin

haal-e-zar apne dil-afgar ka kyon bhul gae
khushk lab yaad nahin dida-e-tar yaad nahin

zahid-e-khushk hue dete hain sab ko talim
shaikh ko apna kabhi daman-e-tar yaad nahin

un ki tanqid-nigahi pe hai dil ko hairat
aib sab ginte hain aur ek hunar yaad nahin

aaj pahlu mein pata dil ka nahin milta hai
kaam kab kar gai duzdida nazar yaad nahin

tiktiki chashm-e-tamanna ko dam-e-jalwa rahi
kis ghadi tut gaya tar-e-nazar yaad nahin

mujh se wada jo liya tum ne jo iqrar kiya
mujh ko to yaad hai sab tum ko magar yaad nahin

mil ke 'saqib' mujhe aara ke sukhan-sanjon se
hui hasil wo khushi ranj-e-safar yaad nahin