zindagi ishq ke mazhab mein bitana chahen
hum tere sath kabhi chand pe jaana chahen

hum qawanin-e-mohabbat mein tujhe le aaen
hum tere nam ka ek mulk basana chahen

hum ye chahen ki tere husn ke parde kholen
hum tere khwab farishton ko dikhana chahen

us ki aankhon mein basar karte rahen umr ke khwab
us ki sanson se hi ab sans badhana chahen

jaante hain ki use dekh ke mar jaenge
phir bhi us shakhs se hum aankh milana chahen

wo jo ek jaan ka dushman hai usi ko 'bushra'
apni ye umr bhi ab us ko lagana chahen