zindagi jaise baddua sain
koi eajaz kar dikha sain

gham ki chadar lapet kar dekha
sari duniya hai bewafa sain

gunge bahron ke shahr mein aakhir
kaun sunta teri sada sain

pas paisa to sari duniya dost
warna koi nahin saga sain

jis ki fitrat mein rahzani thi faqat
wo bana sab ka rahnuma sain

chal pade jis taraf ko ji chaha
apni manzil na rasta sain

phir piyegi zamin lahu 'shahzar'
shahr maidan-e-karbala sain