zindagi ka nishan hain hum log
ai zamin aasman hain hum log

roz jite hain roz marte hain
kis qadar sakht-jaan hain hum log

zindagi muskura to de ek bar
ek shab mehman hain hum log

suraten dhul ho chuki hain magar
husn ke pasban hain hum log

khud se milte hain dushmanon ki tarah
ghair par mehrban hain hum log

ek yahi dard to mila hai hamein
sher-o-naghma ki jaan hain hum log

shakh-e-gul mein jo hum lachak jaen
khinch gae to kaman hain hum log

hum se milta hai manzilon ka pata
aur khud be-nishan hain hum log

ab bhi lipte hain teri thokar se
zindagi teri aan hain hum log