zindagi kis mod par le jaegi socha na tha
panw mein bedi padi thi dur tak rasta na tha

darmiyan aa jaegi meri ana ki maslahat
us se mil kar yun bichhad jaunga andesha na tha

har taraf tha samne nazron ke bahr-e-be-karan
pyas meri jo bujhata ek bhi qatra na tha

kis liye aata nahin mujh ko nazar mera zamir
aainon ka aks yaro is qadar dhundla na tha

zindagi sari gunahon mein guzari ai 'zafar'
log kahte the mujhe achchha magar achchha na tha