zindagi shad nazar aae ki nashad rahe
sab gawara hai magar dil mein teri yaad rahe

jaur-e-sayyaad ko lae na kabhi khatir mein
hum qafas mein bhi rahe aise ki aazad rahe

be-niyazana basar karte hain diwane tere
jo parastar-e-tamanna ho wo barbaad rahe

kuchh bhi ho jae magar rabt-e-mohabbat na mite
ye dua hai ki tumhein fursat-e-bedar rahe

jis ne diwana banaya hai mujhe ai 'shair'
hashr tak shad rahe hashr tak aabaad rahe