zindagi un ki chah mein guzri
mustaqil dard-o-ah mein guzri

rahmaton se nibah mein guzri
umr sari gunah mein guzri

hae wo zindagi ki ek saat
jo teri bargah mein guzri

sab ki nazron mein sar-buland rahe
jab tak un ki nigah mein guzri

main wo ek rahraw-e-mohabbat hun
jis ki manzil bhi rah mein guzri

ek khushi hum ne dil mein chahi thi
wo bhi gham ki panah mein guzri

zindagi apni ai 'shakil' ab tak
talkhi-e-rasm-o-rah mein guzri