zindan mein hun main shahr-e-nigaran se kya mujhe
is gulsitan ki baad-e-bahaaran se kiya mujhe

wo kaam apna kar hi gaya ehtiyat se
yun dekhte ho dida-e-hairan se kya mujhe

viraniyan hain gor-e-ghariban si har taraf
lena hai aaj shahr-e-darakhshan se kya mujhe

chhune lage hain hath mere mehr-o-mah ko
mahfil ki aab-o-tab-e-charaghan se kya mujhe

hathon ko zakhm qalb ko mayusiyan milin
is ke siwa mila hai gulistan se kya mujhe

'mohsin' shab-e-siyah ka mara hua hun main
ab wasta ho sham-e-shabistan se kya mujhe