zist kaise hasin ho jae
aadmi jab machine ho jae

mutmain hain khulus se hum to
aap ko bas yaqin ho jae

khwahish-e-nafs hai yahi har dam
sath ek naznin ho jae

log hain be-shumar jab dil mein
kaise malik makin ho jae

ishq nadan ka jab hua kaamil
phir koi kyon zahin ho jae

bhar gaya zindagi se dil ab to
maut shayad muin ho jae

janm hoga ki maghfirat hogi
faisla ab mubin ho jae

koi 'tanha' ghazal sunae to
ruh taza-tarin ho jae