zist meri azab ho jaise
maut dilkash gulab ho jaise

misl-e-auraq hain sabhi insan
aur duniya kitab ho jaise

shauq se kha rahe hain sab haiwan
ek murda kabab ho jaise

aankh dharti ki surkh hone lagi
nur-e-anjum sharab ho jaise

kab se shoalon pe so raha tha magar
ab bhi wo nim-khwab ho jaise

pankhudi phul ki hai pazhmurda
baad zer-e-itab ho jaise

mil nahin sakti tum ko sairabi
abr 'qudsi' sarab ho jaise