meri soi hui qismat ko jagane aa ja
aa ja aa ja meri bigdi ko banane aa ja

kho gaya aql ki rahon mein mera ahd-e-shabab
az-sar-e-nau mujhe diwana banane aa ja

sard lasha hai mera ishq se khali sina
ek naya soz nai aag lagane aa ja

bagh mein phul hai pazhmurda-o-pamal sabhi
har rawish par tu nae phul khilane aa ja

kan ab pak gae sun sun ke purane naghme
an-sune git nae rag sunane aa ja

sakht hamwar hai yaksan hai meri rah-e-hayat
koi sahra koi virana dikhane aa ja

zahid-e-khushk raha khauf-e-gunah se lekin
ab mohabbat ka gunahgar banane aa ja

kaif ban ja mere dil ka meri nazron ka surur
misl-e-baada meri rag rag mein samane aa ja

manzil-e-zist kidhar hai nahin malum 'habib'
tham kar hath mujhe rah dikhane aa ja