aaj ki taza khabar aaj ki taza khabar aaj ki taza khabar
koi be-par ki nahin koi be-sar ki nahin hai ye par taza khabar

aaj ek taza khabar aai hai ambaale se
lash ek hathi ki nikli hai kisi nale se

doctor dekh ke bola ye use aale se
ye mara zahr se na qatl hua bhaale se

mar gaya bhuk mein ye kha ke kahin kachchi matar
aaj ki taza khabar aaj ki taza khabar aaj ki taza khabar

ek kabadi se mujhe mil gaya jadu ka charagh
raat-din kharch kiya karta hun is par main dimagh

sochta hun ki musibat ko mile dil ko faragh
lekin ab tak na mila koi khazane ka suragh

log kahte hain amal mein hai tere dam ki kasar
aaj ki taza khabar aaj ki taza khabar aaj ki taza khabar

bambai bhaga tha ek ladka jo apne ghar se
jeb khali thi na the us mein nae das paise

shakl t-t ki yakayak jo nazar aai use
aakhirash kud pada chalti hui gadi se

be-ticket khatm hua manzil-e-hasti ka safar
aaj ki taza khabar aaj ki taza khabar aaj ki taza khabar