apni khushiyon ke aarzi jazbaat
gham mein tahlil kar rahi hun main

koshishen hain ki gham sahe jaun
khud ko tabdil kar rahi hun main

zindagi dhaal kar masaib mein
apni takmil kar rahi hun mein

teri rahmat ka aasra le kar
apni tazlil kar rahi hun main

kah rahi hun tere sitam ko karam
khub tawil kar rahi hun main

maut ki wadiyon mein jaana hai
kitni tajil kar rahi hun main

kal iradon mein jaan dalungi
aaj tashkil kar rahi hun main

zindagi ki haqiqaten 'najma'
sirf takhil kar rahi hun main