ab raha kaun mujhe aas dilane wala
ghup andheron mein diya ghar ka jalane wala

khwab-e-ghaflat se jo bedar kiya karta tha
so gaya aaj wo kyon mujh ko jagane wala

jab ki manzil ki tajassus mein tha gumrah-e-safar
chal diya chhod ke kyon rah dikhane wala

ruth jaane ka rawayya ye munasib to na tha
ruth kyon mujh se gaya mujh ko manane wala

phir wo 'khurshid' meri ruh ke andar chamke
kyon chala jata hai har naz uthane wala