kal shab main shahr-e-ishq se lauta jo apne ghar
darwaze tane kasne laga mere haal par

bola daricha kaise akele idhar janab
kyon aur kahan pe chhut gaya ham-safar janab

chup jo hua daricha to gunji sada-e-baam
ab kar sakoge sae tale mere tum qiyam

diwar boli karke mukhatab tamam ko
muhtaj ho gaya hai bechaara kalam ko

ek ho gae daricha-o-diwar-o-baam-o-dar
main chup hi tha ki bol pada sara ghar ka ghar

pai thi kaenat hi tum ne to pyar mein
kyon lut ke phir tum aa gae ho is hisar mein