nazhad-e-barg-o-gul
sahar ki samt ja rahi hai

khwab-kar zulmaton ke dasht se
huruf

zaiche
purane adh-jale

khandar imaraten makan
un ke bhut bhi hain un ke ham-safar

hujum-e-karwan sehr-zada hai
zard daeron mein aks-rez putliyan

faza ko nochti hain
mangti hain khun-e-dil ka

ek ek rahgir se khiraj
main un ke sath hun

ya apna rahzan
dua ki khak baal-o-par se

main jhatak chuka hun
meri raat

meri tirgi
mujhe utarna hai tujh ko khun-e-dil ki

mauj-e-be-karan ke sail-e-garm mein
mujhe pukarna hai us fasurda-dil

udas ajnabi ko
mujh se jaane kab jo dafatan bichhad gaya

ye log mere ham-safar
sahar ke qurb se

hayat-e-jawidan ki mahfilen sajaenge
meri adhuri dastan sunaenge