yahan se darakhton ka har silsila khatm hota hai ab samne zard chatiyal zaminen hain khwabon ke marqad iradon ki lashen rafiqon ke pinjar bikharte hue roz-o-shab aasmanon ki yurish yahan aaj hum bhi pareshan zehnon se girte hue bij bo den ki roz-e-qayamat mein takhir na rah jae koi ye chatiyal zaminen suna hai ki banjar nahin hain ye fasl-e-gul ka shagufta-o-sarsabz imkan abhi mere tere lahu mein bigadti sanwarti rag-o-pai mein jalti kahani ke anjam ka muntazir hai