wo din bhi aae hain us ki siyah zulfon mein
kapas khilne lagi hai, jhalakti chandi ke

kashida tar chamakne lage hain baalon mein
wo din bhi aae hain surkh o sapid galon mein

dhanak ka khelna mamnu,a hai, labon pe faqat
gulon ki tazgi ek saya-e-gurezan hai

wo bhi din aae hain us ke sabih chehre par
kahin kahin koi silwat ubhar si aai hai

zara si muzmahil thodi thaki thaki si nazar
talash karti hai umr-e-gurez pa ke nuqush

use bhi lagta to hoga ki main wahi hun, magar
khizan-gazida thaka sa udas ranjida

use bhi lagta to hoga ki hum wahi hain magar
dil o dimagh ki baham supurdagi ke din

na jaane umr ke kis marhale pe chhut gae
main chahta hun kabhi baat kar ke dekhun to

kahun ki jism to ek aarizi haqiqat hai
kahun darun-e-dil-o-jaan jo ek aalam hai

wahan to waqt ka ehsas tak nahin hota
kahun ki umr se shikwa, gila jawani hai

labon pe harf-e-shikayat dilon mein talkhi si
alil jazbe hain un se hamara kya rishta?

kahun ki aaj bhi subh-e-shab-e-visal ke gul
hamari ruh mein khilte hain, aao sath chalen

pakad ke hath ki agla safar tawil nahin!