subh se sham tak
silsila zist ka

kis qadar hai kathin kis qadar be-aman
lamha lamha sisakti hui zindagi

har qadam par bilakti hui zindagi
khwahishon ki asiri pe nauha-kunan

har ghadi jism-o-jaan
ruh ghayal kharashon ke dil par nishan

roz-e-awwal se jari-o-sari yahan
wahshaton ka saman

koi pal bhi aziyyat se khali nahin
kaun si aankh hai jo sawali nahin

koi waris nahin koi wali nahin
gulshan-e-khwab ka koi mali nahin

khatm hota nahin shor-e-ah-o-fughan
hai azal se abad tak yahi dastan

al-aman al-aman!!