markaz-e-ilm-o-hunar mai-kada-e-soz-o-saz
sajda-e-shauq se aabaad hai rindon ka haram

jam-dar-jam hai sahba-e-junun-e-hikmat
dekhna ho to koi dekh le saqi ka karam

mai-gusari ka ye andaz na dekha hum ne
sab ke dukh dard ka ehsas nashe ka aalam

ek hi aag se har ruh jala pati hai
ho gae ek hi shoale mein sharare mudgham

apne har daur ki tahrik ka aaina liye
phir uthata hai ali-gadh nai duniya mein qadam

rah dushwar mein ek kafila-e-nikhat-o-nur
sang-e-khara ki chatanon ke muqabil hai khada

tut jaega bahut jald tilism-e-imroz
nur-e-farda ke tabassum mein badal jaega