kisi ki tabiat mein pindar-e-masti
kisi ko ghurur-e-jawani ki masti

koi mast mai-khana-e-khud-parasti
amiron ki duniya takabbur ki pasti

farebon ke sae mein dera hai un ka
gunahon ke ghar mein basera hai un ka

koi apne zor-e-hukumat pe nazan
koi mal-o-daulat ki kasrat pe nazan

koi apne aiwan ki rifat pe nazan
koi hashmat-o-jah-o-sarwat pe nazan

wo nasha chadha hai ki bhula khuda bhi
ye sunte nahin bekason ki dua bhi

jo nayab shai ho use dhund laen
jo marghub-e-khatir ho wo chiz khaen

jo garmi ko chahen to sardi banaen
udain pahadon ki thandi hawaen

zamane mein chalti agar hai to un ki
yahan dal galti agar hai to un ki

hai dushwar un ko bulandi na pasti
amiron ki duniya mein mahngi bhi sasti

na dekhi unhon ne kabhi faqa masti
ye hain be-niyaz-e-gham-e-tang-dasti

ye muflis ki mushkil ko kya jaante hain
ye nadar ko khak pahchante hain

guzarti hai shab jo hawas-raniyon mein
to katta hai din fitna-samaniyon mein

ye hain mast apni tan-asaniyon mein
zamana hai in se pareshaniyon mein

gharibon ke haq mein bala banne wale
yatimon ke haq mein qaza banne wale

zamana ho zach jis se wo chaal kar den
jo mumkin ho duniya ka pamal kar den

agar ho sake sab ko kangal kar den
jo khush-haal hon un ko bad-haal kar den

gharaz un ke dil hain mohabbat se khali
ukhuwwat se khali inayat se khali

jo bole koi to zaban kat dalen
jo dekhe koi us ki aankhen nikalen

nahin un se mumkin kisi ko sambhaalen
koi mar raha ho to us ko bacha len

magar shukr hai 'arsh' fazl-e-khuda ka
wo khallaq hafiz hai har be-nawa ka