asir kar nahin sakta inhen koi mausam
ye log apne zamane se aage chalte hain

kahin thaharte nahin ye kisi bhi aalam mein
ye udte lamhon ki raftar ko badalte hain

ye bandagan-e-mohabbat hain in ki barakat se
bisat-e-dil pe hazaron charagh jalte hain

inhin ka faiz inhin ka karam hai basti mein
ki log raqs-kunan hain surur-o-masti mein

mahak rahe hain dilon ke hazar kashane
utar rahi hai gharon mein ye raushni ki baraat

bikhar rahi hai faza-e-zamin khush-auqat
khile khile hain rah-e-zindagi ke sab ashjar

hayat bant rahi hai bahaar ki saughat