dur gagan mein kahin tha ab tak khoya
baadal aaj kai dinon ke baad roya

baadal rota main muskuraata hun
wo gham bitata main khushiyan manata hun

baadal ke aansu ne sara jag bhigoya
baadal aaj kai dinon ke baad roya

ab baadal rota main hansta nahin tha
us ke aansu par maza kasta nahin tha

baadal ke aansu ne hariyali ka manzar laya
sapnon sa tha darpan jag ko aansu ne chamkaya

baadal ne jaise rone ki zid thi thani
us ke aansu dharti par kar rahe the man-mani

ab baadal rota to main bhi rota hun
apne sapne us ke aansu se bhigota hun

hariyali ka manzar jaise ujda kahi khoya
baadal aaj kai dinon ke baad roya

kuchh mahine bite baadal man gaya
apne aansu ko thamna jaise jaan gaya

ab badal muskuraata main muskuraata hun
rone par kisi ke na hansna sab ko samjhata hun

dur gagan mein kahi tha ab tak khoya
baadal aaj kai dinon ke baad roya