khiladi ru-ba-ru baithe hain
apni chaal chalte hain

bichhai hai siyasat ki bisat aur is pe lashen hain
kahin maqtul shaikhan-e-haram ke

kahin par shah ke kushte
kahin malika ke murde hain

kahin jamhuriyat ke adh-mue zakhmi karahe ja rahe hain
khiladi taziyat ke rang ko chehre pe malte hain

badi tahzib aur shafqat se lashon ko uthate hain
unhen malum hai ye apne mohre kab badalne hain

pyaadon ko kahan par gardanen apni katani hain
kahan par kis tarah ek dusre ko mat deni hai

bahut arse se sare match hi ab fix hote hain