gae zamanon se
tirgi mein bhatakne walo

sitam ki lambi siyah raat
ab guzarne wali hai

aur mashriq se
rath mein baitha hua wo paikar

ki jis ki aamad ke
tum hamesha se muntazir the

ki jis ki aamad ke khwab ban ban ke
raat aankhon mein katte the

sunahri kirnon ka taj pahne
nikalne wala hai

tulu-e-farda ki aas mein
tirgi ki rahon pe chalne walo

tumhein bashaarat ho
tirgi khatm ho rahi hai

tulu-e-farda qarib-tar hai
tulu-e-farda qarib-tar hai