ek gali jo kichad ke manind chaspan hui
hont jo kasa-e-muflisi ban gae

hath jo gardanon par jhapatne lage
aur chawal ke jab chand dane mile

antadiyon ka ye aatish-fishan bujh gaya
pet ki bhuk sach-much jahannam ka tanur hai

lekin is bhuk ka kya mudawa karen
jo usulon ke is qaht mein

apne zakhmon pe khamosh hai
shaar-e-am par chatti hai unhen

aur is bhid mein
kaun hai jo use bhik de

sab bhikari hain koi dayalu nahin