rukti sansen hain aur sina
maut ke panw tale hai jina

oghat ghat bhanwar ke chakkar
dag-mag hai jiwan ka safina

gham aur aansu aansu aur gham
gham khana aur aansu pina

barkha-rut viranon ki hai
chandni qabristanon ki hai

man mein lahr kabhi uthti thi
baat ye ab afsanon ki hai

jaise sae reng rahe hon
haalat ye insanon ki hai

hum se ghafil taqdiren hain
be-dast-o-pa tadbiren hain

khushk labon ki murda aahen
bhuke pet ki tafsiren hain

kaise kahen hum bhi jite the
ab to be-jaan taswiren hain

jite hain aur mar nahin sakte
bebas hain kuchh kar nahin sakte

phulon ki khushbu aati hai
daman un se bhar nahin sakte

duniya duniya kahne wale
duniya apni kar nahin sakte

sab ka palanhaar kidhar hai
duniya us ka hi to hunar hai

bane khilaune tut rahe hain
uf ye gharaunda zer-o-zabar hai

kuchh rote hain kuchh hanste hain
aur phir donon ka ye ghar hai