ghata chhai hai sawan ki jhadi hai
dil-e-maghmum ki kheti hari hai

chhalak uttha hai paimana nazar ka
bukhar-e-dil ki aashufta-sari hai

rukh-e-mahtab par taron ke haale
ye tare hain ki moti ki ladi hai

ujale ke liye sham-e-farozan
andhere mein sar-e-mizhgan dhari hai

gul-e-nargis pe hain shabnam ke qatre
ki sipi hai jo moti se bhari hai

umand aaya hai dariya jazb-e-dil ka
bhanwar mein sabr ki kashti padi hai

'jamil' ashaar mein gauhar-fishani
ye chashm-e-tar ki sab jadu-gari hai