shahr mein circus aaya hai
khel tamashe laya hai

hathi unt aur ghode hain
sab hi yun to bhagode hain

sab ko pakad kar laya hai
shahr mein circus aaya hai

udti uchhalti kar bhi hai
khelon ki bhar-mar bhi hai

sare khiladi aur joker
tar pe chalte hain sarsar

shahr umad kar aaya hai
shahr mein circus aaya hai

sher bhi hai aur bakri bhi
kutton ki ek toli bhi

ek bada sa bhaalu hai
kuchh us ke ham-joli bhi

bhan-mati ka kumba hai
jo circus ne joda hai

hathi puja-path kare
bandar bandar-bant kare

bhaalu nach dikhata hai
tota top chillata hai

sabhi dikhate hain kartab
joker ab gira ya tab

sab ke man ko bhaya hai
shahr mein circus aaya hai