husn jab ham-kalam hota hai
ishq bhi be-lagam hota hai

lutf jis par mudam hota hai
us ka qissa tamam hota hai

un ko jis roz kaam hota hai
mujh se us din kalam hota hai

aashiqon ka nahin jo ghar koi
hotalon mein qiyam hota hai

aap hain aur majma-e-aghyar
roz darbar-e-am hota hai

ghair aata hai un ki dawat mein
mujh ko khana haram hota hai

apne ghar par kahan wo milte hain
raste mein salam hota hai

aire ghairon ka zikr kya hai 'zarif'
ab to wo but bhi ram hota hai